વિધાનસભાની ચૂંટણી નિયત સમયે આવે તો હવે માત્ર દોઢ વર્ષની જ વાર છે. છતાં રાજય સરકાર બોર્ડનિગમોમાં રાજકીય નિમણૂકોનો દોર આગળ વધારવાની વેતરણ કરી રહી છે. ચાલુમાસમાં જ એટલે કે આવતીકાલે યોજાનારી ગાંધીનગર મહાનગર પાલિકાની ચૂંટણી બાદ તુરત જ કેટલાક પદોની લ્હાણી કરવામાં આવશે તેવા સંકેતો ટોચના વર્તુળોમાંથી પ્રાપ્ત થઇ રહ્યા છે.
પ્રાપ્ત માહિતી અનુસાર ગાંધીનગર કોર્પોરેશનુમાં અને સ્થાનિક સ્વરાજયની અન્ય નગરોની ૮૧ બેઠકોમાં આવતી કાલે પેટા ચૂંટણી યોજાનાર છે. આ ચૂંટણી પછી તરત જ કેટલાક મહત્વના બોર્ડનિગમોમાં ચેરમેનની અને ત્યા ચેરમેન નિયુકત થઇ ગયા છે. તેવા બોર્ડ તથા નિગમોમાં શ્રેણી બધ્ધ ડિરેકટરોની નિમણૂક કરવામાં આવે તેવા એંધાણ સ્પષ્ટ થઇ રહ્યા છે. એપ્રિલના ઊત્તરાધર્માં અથવા ૧લી મેની ઊજવણી પછી તરત જ બોર્ડ નિગમોમાં નિમણૂંકો અને વહીવટી તથા પોલીસ તંત્રમાં ધરખમ ફેરફારો આવી રહ્યા છે. મોટાભાગના કલેકટરો, મ્યુનિ. કમિશનર, સચિવોની બદલીઓ થાય તેવા સંજોગો સર્જાયા છે.
પોલીસ તંત્રમાં ડીવાય એસપીથી લઇને આઇજીપી કક્ષા સુંધીનો બદલીનો દોર આવી રહ્યો છે. પ્રાપ્ત માહિતી અનુસાર નવા પંચાવન પ્રાંતની રચના થતા ત્યાં નિમણૂકો માટે ડે. કલેકટર કક્ષાએ મોટા ફેરફારો થશે ટી.ડીઓને ડે. કલેકટર કક્ષાએ બઢતીના સંજોગો સર્જાવા પામ્યા છે. આ તમામ બદલી અને બઢતી આગામી દોઢ વર્ષ પછી આવી રહેલી ગુજરાત વિધાનસભાની ચૂંટણીને અનુલક્ષીને થઇ રહ્યાની ચર્ચાએ જોર પકડ્યું છે. તેથી હવે પછીની ઊચ્ચસ્તરીય નિમણૂકોમાં આ બાબતને ધ્યાને લેવાય તે સ્વાભાવિક છે.
No comments:
Post a Comment